1Ti 1 | PONPDN | STEP | PAULUS wanporon en Iesus Kristus amen pan kusoned en Kot Saunkamaur patail o Kristus Iesus, me kitail kaporoporeki,

1 Timothy 1

1 PAULUS wanporon en Iesus Kristus amen pan kusoned en Kot Saunkamaur patail o Kristus Iesus, me kitail kaporoporeki, 2 On Timoteus nai seri melel ni poson mak o limpok, o popol san ren Kot Sam o Kristus Iesus atail Kaun. 3 Duen ai poeki re om, en mimieta Episus ni ai pan kola Masetonien, pwe koe en kapun on akai, ren der wia padak toror. 4 Pil der kamelele kasoi mal o padok en di to to, me kareda Akamai ap sota sausa koa dodok en Kot, me tapi san poson. 5 Pwe aude pan kusoned limpok san nan monion makelekel, o insen mau, o poson melel. 6 San mepukat akai muei saner, rap wuki on poupoulap. 7 Re men wiala saunpadak en kapun, ap so weweki, me re inda, o me re kin men padaki kaualap. 8 A kitail asa, kapun me mau, ma amen so kasapune. 9 O se asa, me sota kapun en wiaui on me pun amen, a on me sapun kan, o katiwo kan, o me doo san Kot akan, o me dipan akan, o me so saraui kan, o me san Kot akan, o me kin kaloke sam ar in ar, o me kamela aramas akan. 10 O me nenek kan, o me madon saut on ol oko, o me kin pirap aramas akan, o me likam kan, o me kaula likam akan, o ma pil meakot mia, me so kon on padak en kamour. 11 Duen ronamau en linan en Kot iasanai me pan don ia. 12 I ap danke Kristus Iesus atail Kaun, me kotin kamane ia da o kamelel ia ni a kotin kasapwil ia dan dodok. 13 pwe mas o nai lalaue amen, o kaloke saulan kan, ao lolap amen, ari so I diaradar mak o, pwe I wiadar mepukat ap sasa o ni ai soposon. 14 A mak en atail Kaun me lapalap alar kaualap ni poson o limpok, me mi reh Kristus. 15 Melel lepen kasoi lep, o me mau on kamelele: Kristus Iesus pwara don sappa, pwen dorela me dipan akan; a nai me sued san karos. 16 Ari so, I diaradar mak o, pwe Iesus Kristus en kotin kasaleda a kanonama lapalap re i, pwe men kaalemoni on me pan poson, pwen maur soutuk. 17 A nanmarki potpot, me so kak mor pasan, o so sansal, I Kot eta. Wau o linan en ko on I potopoteta! Amen. 18 Kusoned wet I men pan on uk, nai seri Timoteus, duen deideikop akan, me wiaui on uk er, pwe ren sauasu uk, en wia pei mau eu. 19 Ni om dadauata poson o kanakanai on insen om mau, me akai pein kase san irail, ap peila san nin poson. 20 Amen irail Imenaus o amen Aleksander, me panalan Satan, pwe ren lelapok ki kalokolok, ap solar lalaue.